頭擺係講做天旱，時間又拖盡久該下，就會請地方父母官，也係大老爺來摎天公爺求水。求水該下，所有个參與者都愛麻衣大孝，像形屋下死爺死哀共樣，這係一隻當有意思个儀式。仰般求水都愛麻衣大孝偌，𠊎請教異多人都毋知，𠊎就去做田野調查，來解決這隻問題。
       根據新豐鄉耆老徐石科先生佢个說明係恁仰个，佢講：頭擺有一個人屋下當苦，斯降着一個妹仔，又無位所好戴，該兩子爺斯共下生活又睡共下，妹仔慢慢大咧，有人來做媒人佢都無愛。庄中个人斯開始誚話，講厥爸仰般又仰般，係扒灰仔，傳到當難聽。雖然受著庄民个冤枉，日仔還係愛過，厥爸佇七十零歲該下過身，庄中个人知着斯來處理後事，滕手个人講：這隻漦貨仔，係扒灰仔恁夭壽，愛摎佢顛倒埋，毋好分佢再過出世來做扒灰个事情。埋好以後，過一站仔，地方就開始做天旱，庄民哀哀唧唧，無水好食，斯去請大老爺來看，係天年也係哪位有所爭無，到底係麼个問題。
       大老爺來到庄中斯這看該看，佢發現有一門風水怪怪，斯問庄民講這係麼人个風水，庄民就回大老爺講：斯係該個扒灰牯个。大老爺講：這毋係天年所爭，係你兜冤枉佢摎佢顛倒埋，連天公爺都看毋過去。所以，做天旱來責罰你兜，庄民聽講以後就回大老爺講：𠊎兜知毋著咧，係毋係請大老爺做主，帶𠊎兜摎天公爺求水，大老爺講好，毋過你兜歸庄人都愛麻衣大孝參加，一來摎這門風水个主人表示恩兜个失禮，二來表示你兜个誠意，恁仰相信天公爺會受著感動个，庄民斯照大老爺个指示去準備。
       經過大老爺帶領庄民誠心懺悔，虔誠求水，天公爺受着佢兜个感動，就連町落三日水，解決庄民無水个問題。
      另外，根據竹北市今年九十四歲个徐源丙地理先生講：佢識聽人講過求水，毋過毋識看過仰般做，記得《幼學瓊林》書中有一段句仔講「齊婦含冤，三年不雨」，這隻故事係講：頭擺齊國有一個婦人家安着竇娥，知上知下，對家官家娘非常有孝，降有一個倈仔，佢還當後生个時節，厥老公摎倈仔嗄來過身忒，厥家娘斯喊佢改嫁，毋過佢毋肯，厥家娘毋想拖累佢，該暗晡斯吊頸死。
     厥姑仔知着以後就告官，講佢害死厥家娘，郡守大人無詳查，斯判佢死刑問斬，斬忒以後就連町三年做天旱，該段時間有官差認為郡守大人冤判這個婦人家，經過一段時間个調查以後，郡守大人自家乜認為係誤判，佢就率領地方頭人來到這個婦人家个墳前，斯像屋下死爺死哀共樣麻衣大孝，虔誠來摎這個婦人家會失禮並還佢清白，同時求這個冤枉死个婦人家原諒大家。
    可能係有罅誠心，得着冤死个婦人家原諒，同時，郡守大人个誠心認錯，感動天公爺，就連町落三日大水，解除無水好食个問題。因為這隻認錯个儀式解決這隻大問題，所以，過後係講哪位有做天旱个時節，斯會請到大老爺來率領地方頭人，還過有德有孝个人來求水，該所有个齣事，斯照町頭擺郡守大人个方法，一般來講 ，求好三日內都有落大水哦。
       還過，根據新豐鄉今年九十九歲个耆老林棋鑑先生佢講：佢識聽人講過求水，乜還識親身參加過，大約在七十年前（西元1950），新豐地區做天旱，地方人士斯請當時个鄉長黃仁恩先生，還過地方仕紳摎有孝个人總共六儕，佇中崙三元宮搭起雨壇來求水，時間係三日三夜，幾個頭人愛先摎天公憑筶，愛有三聖正做得參加，毋係想愛來參加斯做得。
      當時庄內幾隻大姓族都有派人參加求水儀式，像黃屋就係鄉長黃仁恩代表，新庄仔徐屋派前庄長徐慶旺代表，中崙林屋派鄰長林斗代表，崁頭陳屋派陳代表，坑口楊屋派楊代表，請神摎文疏撰寫係人稱聖人伯个黃春仙黃逢春先生擔任。
     吉時一到，請神先生黃春仙就恭讀叩求甘雨文表，文表讀忒以後，大自家佇中崙三元宮廟前个雨壇行求水儀式以後，就佇庄內三步一跪五步一拜，歸隻儀式非常虔誠恬靜，無人敢嘻嘻譁譁打嘴鼓，驚怕無正無經得罪天公，到時求毌着水，該隻罪責係無人擔得起个。眾人嘴肚喊町像死爺死哀該時共樣个聲音，緊喊講：天公啊救命哦，天公啊落水哦，恁仰形行到紅毛港橋下，來到該事先搭好个雨壇前簡單祝告以後，有人斯脫忒衫褲打赤膊，無人戴笠嫲，盡量膚身分佢汗流脈絡歸身澇澇，拿町漁網跳落河壩網魚，主要係想愛網著鯉嫲，因為佢係代表五湖四海龍王，係講你捉着蝦公無斯毛蟹該時，一定愛挶恬恬，無會分人咒死哦。該捉着鯉嫲个人，就愛大聲喊講有鯉有鯉，同時煞煞摎佢放在盎肚，帶轉三元宮放在雨壇面前，表示龍王請來咧，儀式結束該下，還愛摎佢送轉坑壩肚。
      儀式總共愛進行三日三夜，時間有兜仔長，裡肚个人個個跪到牙嚴目皺，目汁瀾泔，毋知係感動，也係膝頭跪到腫像碗公恁大痛到曒，實在還衰過哦。本來係𠊎爸參加个，因為佢係鄰長，毋過該下佢已多歲咧，看佢跪到悸悸顫，𠊎講𠊎來換佢，掌雨壇个人講做毋得，毋係你想換就換，包尾佢兜也感覺着忒悿，斯講無來摎天公爺憑筶看啊，係愛有三聖正做得換哦，可能係𠊎个孝心有感動著天公爺，佢同意𠊎換，摎𠊎爸換好以後，喊佢到外背歇困，佢還係毋肯，坐到裡肚更加虔誠跈拜。 經過大自家三日三夜虔誠个求水，三日過斯有落兜水，雖然毋係落大水，毌過泥皮有濕啦，有總比無較贏。
      另外《漢書》「于定國傳」乜有如下个記載： 雋疏于薛––-:東海有孝婦，少寡，亡子，養姑甚謹，姑欲嫁之，終不肯。姑謂鄰人曰：「孝婦事我勤苦，哀其亡子守寡。我老，久絫丁壯，柰何？」其後姑自經死，姑女告吏：「婦殺我母。」吏捕孝婦，孝婦辭不殺姑。吏驗治，孝婦自誣服。具獄上府，于公以為此婦養姑十餘年，以孝聞，必不殺也。太守不聽，于公爭之，弗能得，乃抱其具獄，哭於府上，因辭疾去。太守竟論殺孝婦。郡中枯旱三年。後太守至，卜筮其故，于公曰：「孝婦不當死，前太守彊斷之，咎黨在是乎？」於是太守殺牛自祭孝婦冢，因表其墓，天立大雨，歲孰。郡中以此大敬重于公。       根據上文斯提「殺牛祭婦墓」，雖然無提「麻衣大孝」个事情，毋過合理个解釋，應該係當時接任个太守自家乜認為係冤枉誤判，佢就率領地方頭人來到這個婦人家个墳前，斯像自家屋下死爺死哀共樣，大家麻衣大孝，虔誠來摎這個婦人家會失禮。同時，表揚佢个孝行摎教育百姓，對老人家愛有孝並還佢清白，乜祈求這個冤枉死个婦人家能夠原諒大家。
      因為這隻認錯个儀式解決大家个問題。所以，過後係講哪位有做天旱个時節，斯會請到大老爺來率領地方頭人，還過有德有孝个人着麻衫無戴孝來求水，該所有个齣事，斯照町頭擺郡守大人个方法傳承到現代。 上一篇報導 更多專題報導 複製本頁連結 下一篇報導